DORE IMIYOBORERE MYIZA YA FPR I NYAGATARE ?

Imiyoborere myiza ya FPR muri Nyagatare.

Taliki 25 ukwakira 2013 amarira yari yose mu kagali ka Gakagati ya kabiri umurenge wa Rwimiyaga, akarere ka Nyagatare, kuko abaturage barenga 500 nk’uko mubibona ku mafoto leta ya FPR yabatsinze amazu hejuru, none ubu ntibagira aho bakinga umusaya kuko barara ku gasozi nk’inyamaswa. Uru rugomo bakorewe na leta yabo, rwatumye ubu barahinduwe nk’impunzi mu gihugu cyabo. Nkuko tubikesha ikinyamakuru cya FPR, igihe.com, ubuyobozi bw’akarere ka Nyagatare burikirigita bugaseka kuko buhakana urucabana bwemeza ko butigeze busenyera abaturage nyamara bigaragarira buri wese.

Ku ruwo wa gatanu ngo nibwo imodoka nyishi zuzuyemo abanyururu ziherekejwe n’abayobozi b’akarere bigabije amazu y’abaturage barayararika none ubu bakaba barara rwantambi mu bisigazwa by’ahahoze amazu yabo.

Abo baturage bemeza ko ngo batangiye kuhatura kuva 2007,  kandi banafite ibyangombwa; bemeza kandi ko leta yaba yarahagurishije undi muntu bo batabizi. Ku busanzwe iyo leta ishaka kwimura abaturage, igomba kubikora mu nyungu rusange kandi nabwo ikabaha ingurane ihwanye n’imitungo yabo. Nyamara amateka ya hafi y’u Rwanda,  atwereka ko uyu muco wo guhuguza abaturage, abanya Kigali bo bawumenyereye n’ubwo ntawumenyera akabi. Abaturage b’ahahoze hitwa mu kiyovu cy’abakene, cg se ahitwa za Kagugu bakomeje kwinuba kenshi uburyo imitungo yabo leta yayigurishije ikabimura shishi itabona ibahaye ingurane z’intica ntikize  nyamara yo igahindukira ikahagurisha akayabo n’abashoramari. Nyamar ahenshi hagurishijwe n’ubu haracyari  ibigunda kuko hataratangira kubakwa.

ESE FPR N’ISHYAKA CYANGWA  NI SOSIYETE Y’UBUCURUZI?

Kuva FPR yafata ubutegetsi yagaragaje inyota ikomeye yo kwigwizaho ibya rubanda. Babinyujije mucyo bitaga privatization FPR yafashe ibyari ibigo bikomeye bya leta maze ibiteza icyamunara aho yakoreshaga amasosiyete cyangwa abantu ba baringa ikabyigurishaho kugiciro gito cyane. Ng’uko uko icapiro ry’igihugu ryagurishijwe rigahinduka Imprimerie nouvelle, ikitwaga trafiporo kiba kiragiye, indandaz’ibireti iba izigabije Paul Muvunyi n’ibindi tutarondora. Uko gukirira mu miborogoya rubanda  kwa FPR kwatumye ubu iri mu mashyaka yambere akize kwisi. Ndetse uwavuga ko ikize kuruta leta akaba ataba abeshye. Ahantu hose hari agafaranga FPR yahateye amatako, hirya no hino mu gihugu uyitunze urumiya wese aho ashaka hose irahamuha itajijinganije. Uhagorerwa ntawundi n’umuturage usabwa guhambira igitaraganya aterekwa n’aho yerekeza. Igisigaye n’uko uzumva kagame yateje cyamunara u Rwanda.

UKO TUBIBONA

Abazi amateka bazi ko intandaro ya za revolution za giye ziba hirya no hino kw’isi zaterwaga n’urugomo rukabije ubutegetsi bwabaga bukorera abaturage byamara kubarenga bakabwirohaho bakabumenesha. Mu gifaransa bakoresha imvugo nziza ya “ oppression” iyo leta ibaye ruvumwa igahitamo kuba oppresseur igatoteza abo yagatonesheje,  iminsi yo kubaho kwayo iba isigaye ibarirwa ku mitwe y’intoki.

S’ubwa mbere si n’ubwa nyuma ingoma ya FPR isenyera abanyarwanda, kuberako ubutaka bwabo yabugurishije abanyamafaranga. Aka karengane kahawe intebe, umuti ukaba nta wundi aruko abanyarwanda bakwiye kubonako n’ubundi urwo kagame na FPR batwishe atari ruto. Aho gukomeza kubaho nk’abacakara mu gihugu cyacu, FPR iducura bufuni na buhoro, irya utwayo ikarya n’utwacu twaruhiye, dukwiye guhaguruka  tukiroha kuri buriya butegetsi tukabumenesha  tugashyiraho ubuyobozi bw’umva ko igihugu kitagomba kuba indiri y’ibisambo n’abicanyi.

NKUNZURWANDA MIHIGO ALEXIS

AFRIKA Y’EPFO

NYUMA YO GUHUSHA GEN KAYUMBA, UMWICANYI JACK NZIZA NA MANEKO RUTEMBESA BAHUSHIJE CAPT RUTAGENGWA EMILE

             Jack Nziza                                                     Nsabimana Joseph                                                Didie Rutembesa                      

Emile Rutagengwa ni muntu ki?

Emile Rutagengwa n’umwe mu banyarwa b’ikubitiro bitabiriye urugamba rw’inkotanyi rwo gukuraho Kinani kuko yagiye mu nkotanyi mu 1991 afite gusa imyaka itarenze 18 ans. Akigerayo yinjiye muri batayo ya Charlie mobile force yayoborwaga na nyakwigendera CYIZA. Muri za 93, Emile yoherejwe muri ba basirikare 600 bitaga RUKAGA boherejwe muri CND, icyo gihe akaba yari afite ipeti rya S Lt. Mu 1994, igihugu kimaze gufatwa yinjijwe mu ishami ry’iperereza rya gisirikare DMI ( Directorate military intelligence).

 Mu  mwaka wa 2000, nyuma yaho Jack Nziza yatangiraga kuyobora DMI, Emile yari amaze kugera ku ipeti rya Capt. Nkuko bisanzwe iteka, Jack Nziza yatangiye kwikiza bamwe mubari basanzwe muri DMI, ni muri urwo rwego yashatse gukindura Emile nyuma  yo gushaka kumukoresha mu kwica bagenzi be undi akabyanga. Kuva muri 2000,Cpt Rutagengwa yahisemo guhunga igihugu, kuva 2001, akaba abarizwa muri Afrika yepfo nk’impunzi. Kuva yagera mu buhungiro JacK Nziza yakoze ibishoboka byose ngo ahamutsinde, inshuro nyishi Imana igakinga akaboko.  Muri 2010, kuva RNC yashingwa, ari mu bikubitiro bayitangije muri Afrika Y’Epfo. Akaba asanzwe ari umwe mubagize  NEC. Kubera guhigwa na leta ya Kigali, Leta y’Afrika y’Epfo ikaba yaramwemereye gutunga imbunda yo kwirinda.

NSABIMANA  YOZEFU ni muntu ki?

Uyu mugabo ukomoka mucyahoze ari Nyaruhengeri muri Butare, yahunze u  Rwanda kuva 1994, akaba aba hano muri afrika y’epfo nk’impunzi. Nyamara,  mu mwaka ushize we na mugenzi we Nyandwi Seratsiyeri, Nyuma y’ubuhendabana bwa maneko Rutembesa bakaba baragiye mu Rwanda muri rya kinamicyo rya Come and See. Aho i Kigali, bakaba ariho bavanye amabwiriza yo kuneka abanyamuryango ba RNC, kuyisebya  ndetse no kubagambanira. Kuva icyo gihe, uyu mugabo na mugenzi we Nyandwi  bakaba bahoza akarenge kuri ambasade babunza utugambo twa mpemuke ndamuke.

Uko Rutembesa Didier na Nziza Bashatse Kwica Emile?

Hari Pretoria, mu ijoro rya tariki 28/09/2013, ubwo Nsabimana  YOZEFU yinjiraga muri Hotel Maxim agatangira kwiyenza kuri Emile n’abandi bari kumwe atukana cyane, abita imbwa zo muri RNC ndetse akababwirako yabahondagura. Baramwihoreye arashyekerwa, hashize akanya Emile yaje kujya muri toilette maze undi amuhengera ari kwihagarika ahita asingira imbunda ya emile ashaka kuyimwambura baragundagurana kugeza emile amurushije ibigango  ahita asohoka ajya gutanga ikirego muri polise.

Bukeye bwaho nibwo polisi yataye muri yombi  NSABIMANA, afungirwa muri gereza ya NEW LOCK Pretoria. Ejo taliki 11 ukwakira 2013, akaba aribwo yitabye urukiko rwa  Landskdrskantoor Magistrate I Pretoria, aho aregwa ibyaha by’urugomo byo gushaka kwivugana Emile. Cyokora urukiko rukaba rwarasubitse urwo rubanza mu gihe i perereza rigikomeza. Hagati aho ejo kurukiko niko za maneko za ambasade zahihibikanaga zirebuzwa abitabiriye urwo rubanza. Maneko rutembesa akaba akomeje gukora uko ashoboye ngo Yozefu afungurwe.

UKO TUBIBONA

N’ubwo muri kwa kwishongora kwa Kagame yavuze ko leta y’u Rwanda idahusha, iyo urebye ibisigaye biyibaho, ngaho yahushije Kayumba, FRANK, ngiyo bayifatanye igihanga I kampala ishimuse Lt Toburende, none irongeye ihushije Emile,  mu by’ukuri usanga isigaye imeze nka ya ntare ishaje isigara itungwa no kurisha. Nkuko twigeze ku byandika kuri rncnewsonline, kuva aho Gen Kayumba ahungiye muri Afrika y’epfo, Kagame yataye umutwe ku buryo yize kunywa inzoga ( ka  divayi bamutumiriza mu Butariyan), ndetse ubu umuganga we Dr Gasakure akaba yaramutegetse kunywa feneriga kugirango abashe kubona udutotsi.  Abumvise ijambo rye ijambo rye arahiza abadepute mwumvise ukuntu yandukiriye mumaganya menshi agatuka RNC  y’Afrika y’epfo. Byose ntakindi kibimutera n’ubwoba ahorana. Nyuma yo ku mwita , ikigarasha, umwanda,  isazi azichisha inyundo ntako atagize ngo amukure kwisi ariko Imana igakinga akaboko. Aha muri Afrika y’epfo  Jack Nziza akoresheje Rutembesa, maneko w’ambasade ntako batagira ngo bajujubye impunzi zihaba, ariko cyane cyane umuntu wese waba afite aho ahuriye na  Gen Kayumba Nyamwasa na Col Patrick Karegeya, akaba ari muri urwo rwego capt Emile Rutagengwa wakoranye bya hafi n’aba bagabo, ahigwa bukware na leta ya Kigali, mu gihe kandi, na  Frank Ntwari muramu wa Gen Kayumba akaba n’umuyobozi wa RNC muri Afrika y’epfo aheruka  guteragurwa ibyuma agasigwa ari intere.

Abayoboke ba RNC muri Afrika y’Epfo bakaba basabwa gukomeza umutsi mu rugamba rwo gucungura u Rwanda, ariko kandi, bagakomeza kuryamira amajanja kuko umwanzi atarakura mu rujye, kandi maneko Rutembesa Didier na Jack Nziza mu rwego rwo gushimisha shebuja kagame, bakaba bagikubita agatoki ku kandi mu mugambi wabo mu bisha wo kurimburana n’imizi abanyamuryango ba RNC muri Afrika y’epfo. Cyokora nkuko duhora tubivuga Rutembesa na Nziza bakwiye kwibuka ko “inkware y’inyabugingo itora mu itongo ry’uwayihigaga” Tukaba tuzakomeza kubakurikiranira iby’uru rubanza.

NKUNZURWANDA Mihigo Alexis.

PRETORIA AFRIKA Y’EPFO.

DORE URWO ABAPFAKAZI BAPFUYE, DORE UKO MAFIA ZIDAMARAYE

Indege z’umuherwe paul, inzu y’abapfakazi ba Mwurire, City tower inzu ivugwa ko nayo ari iya Paul Kagame.

Iyi n’imwe mumazu yubakiwe abatishoboye barokotse genoside yakorewe abatutsi mu 1994, mu murenge wa Mwurire mu karere ka Rwamagana. Mu  byukuri, uru nirumwe mu ngero zigaragaza ko ubutegetsi bwa FPR n’ubwo nta kindi gitumye buramba uretse kurisha genoside, inkirirahato zayo ntacyo iyo leta izimariye.

Hirya no hino abapfakazi n’imfubyi ntibagira ayo bacira n’ayo bamira. Uretse gushengurwa no kuba basigaye ari incike, inzara nayo ntiboroheye tutibagiwe ko abenshi batagira naho bakinga umusaya. Umubare munini kandi w’abategarugori bafashwe ku ngufu muri genoside bakanduzwa sida ntibabasha no kubona imiti yo kwivuza. Nyamara hari bamwe mu banyarwanda bokamwe n’amacakubiri ujya kumva ukumva bikoma abarokotse genoside ngo ubutegetsi n’ubwabo nyamara ari ingorwa zitagira uwo zitakira. Bamwe mu barokotse bari mu bushorishori bw’ubutegetsi bwa FPR indambi yabarenze ntishobora gutuma bibuka bagenzi babo bararanye muri za prafo cg mu mfunzo n’ahandi mu bihuru.

Abantu nka Dr Biruta Vincent, Mitali Protazi, ba depute Kalisa Evaliste n’abandi bakavugiye izo ngorwa bashishikajwe n’inyungu zabo bwite mu kuzamura amagorofa za Nyarutarama aho umuntu nka Biruta afite igorofa y’igitangaza, mu gihe bene wabo bazize umudari. “Aba bategetsi babaye ba mwanga ababo barya utwabo bakarya n’utwabandi bakwiye kwibuka ko urya inshuro n’inshuti bigashira udahaze”. kandi ko umuvumo uzava mumarira y’izi mfubyi utazabasiga amahoro.

Nta munyarwanda ukwiye kwibeshyako ko ubutegetsi buriho ari ubutegetsi bw’abatutsi? Yemwe n’abacitse kwicumu imibereho yabo nyuma y’imyaka 20 murabonako iteye agahinda?

Ntibyumvikana ukuntu nyuma y’imyaka 20 hari abacikacumu bicwa n’inzara badafite aho barara nyamara haratanzwe inkunga zitagira ingano nyuma ya genoside harimo izatanzwe na Bill Clinton inyishi zikanyerezwa.

UKO TUBIBONA

Umwanzi w’abanyarwanda n’umwe n’ubutegetsi bw’igitugu bwa FPR bugizwe n’agatsiko k’ibisambo n’abicanyi birundaho byose nk’amasiha. barushako gutumbagira mubushoshorishori bw’ubukire mu gihe miliyoni z’abanyarwanda zisigaye zirushaho kumanuka mu rwobo rw’ubutundi.

Ikibazo gikomeye igihugu cyacu gifite usanga ari “capitalisme sauvage” FPR yubatse. Kuko usanga ubutunzi bw’igihugu buri mu biganza by’abantu batarenze ibihumbi bibiri. Ibi biterwa n’uko usanga amafaranga menshi y’igihgugu agendera mu bikorwa bya fonctionnement des institutions nko mu mishahara y’abategetsi, kubagurira amamadoka atajyanye n’ubushobozi bw’igihugu mugihe usanga mu bikworwa by’amamajyambere hashyirwamo asagutse. Nta gihugu rero kwisi usanga cyatera imbere kiyobowe gutya. Ibi byose biterwa no kuberako mu gihugu cyacu ibintu bicuritse, abaturage batinya abategetsi kuko babafata nkaho aribo ba boss babo, nyamara  muri demokarasi abategetsi nibo batinya abaturage.  Ibi byose FPR mu kubikora ni ruswa yo mu bundi bwoko kuko umuntu ihaye akazi aba ari inzira y’ubusamo yo gukira atavunitse. Bityo ugasanga yubaha yigura kuko aba atinya kunyagwa. Cyane ko FPR iyo ikwanze, iyo ugize amahirwe ntikwice iragukenesha bikomeye. Ingero ninyinshi ntitwazirondora.

“Ikindi kintu giteye ishozi n’ukuntu abategetsi b’u Rwanda bakunda kuvuga ngo igihugu kirakennye ngo rubanda rugomba kwizirika umukanda mu gihe bo imikandara yabo badasiba kwimura intoboro zayo kubera kwijuta” byabaye nka byabindi byo kwa padiri ngo mwumve ibyo mvuga ntimurebe ibyo nkora.  Mu gihe amafaranga yaguze izi ndege ebyiri za kagame miliyoni 160. Z’amadorari ashobora kubakira abacitse kwicumu bose, Ubu amakuru tugikurikirana n’uko perezida Kagame yaba aherutse kugura indi ndege ye ya gatatu. bibaye aribyo yaba abaye aka za ndagu za Magayane, aho avuga ngo Rwabujindiri umugabo urya ntahage??

NKUNZURWANDA MIHIGO ALEXIS

RADIO ITAHUKA PRETORIA-AFRIKA Y’EPFO

ABA BAGABO BAZASOBANURA RYARI AHO BASHYIZE IVARISI YUZUYE AMADORARI KABILA YABAHAYE?

UBURYO BIBYE IVARISI Y’UZUYE AMADORARI MU CYUMBA KWA KABIRA.

Nyuma yo gufata Kinshasha, ingabo za kabarebe zasahuye banke nkuru ya kongo cyane za zahabu za koreshwaga nka reserve kuko amafaranga menshi yo Mobutu yari yayahunganye. Reserve zimwe za pakiwe indege zizanywa I kigali. Aho kabila agereye I Kinshasa utwari dusigaye yaragurishije amafaranga menshi akabika mu nzu iwe. Umunsi umwe uwitwa capt aGakwerere Jean Marie Vianney wari chief escort wa Laurent desire Kabira akaba ariwe muntu wenyine washoboraga kwinjira mucyumba cya perezida kabira, uyumugabo yaje guterura ivarisi yuzuye amadorali arayarigisa. Aho perezida kabira aziye arayibaza Gakwerere ayishakisha byanyirarureshwa ariko irabura. Arangije afata abasirikare barinda ho bose arabafunga.

Byabindi ngo ntawuyoberwa umwibye ayoberwa aho amuhishe; Kabila byara mubabaje abona ko ari Gakwerere wa mwibye ahita amutegeka ko afungura abo banabose. Kabila yamubwiye ko ntamwana n’umwe washoboraga gutinyuka kwinjira mu cyumba cye..Muri abo bana bari bafunzwe harimo uwitwaga Hakizimana bakundaga kwita “Kirenge”. Tubibutse ko uyu capt Gakwerere ariwe wari uyoboye umugambi mubisha wokurasa gen Kayumba Nyamwasa nyuma yuko ubutabera bw’afrika yepfo bumurekuye by’agateganyo akaba yarahise atorongerera I Kigali.

UBURYO KABAREBE YANYEREJE IMISHAHARA Y’ABASIRIKARE BARWANYE KONGO

Ingeso mbi za Gakwerere, Kabarebe no gukomeza gusuzugura Kabira, biri mubyatumye abazinukwa aniyemeza kubamenesha mu gihugu cye. Leta ya Kabila imaze gutegeka abasirikare b’u Rwanda bose gutaha, Kabila yafashe ivarisi yuzuye amadorari tutarabasha kumenya umubare wayo, maze ayiha Gen James Kabarebe amubwira ko ayomafaranga ari agomba guhemba abasirikare b’u Rwanda bamufashije gufata ubutegetsi. Iyo varisi yaje itwawe n’aba escort ba kabarebe barimo uwitwa RENE. Uyu RENE akaba ariwe uherutse kwinjira muri Hoteri I Kampala afite imbunda ayoboye abari  mu mugambi wo gushimuta L t Yoweri Mutabazi. Tugarutse ku bya kongo, Indege yajemo ayo mafaranga irimo na Kabarebe niyo yanyuma yageze I Kanombe. Ikibabaje n’uko ayomafaranga yose ntanurupfumuye rwahawe abo basirikare kuko yigiriye mu mufuka wa Kabarebe na shebuja. Bamwe mubasirikare ba gerageje kubaza ibyayo barabifungiwe cyokora kumpamvu z’umutekano wabo tukaba tudashobora gutangaza amazina yabo. Abo basirikare bari bamaze Kongo imyaka irenga ibiri uwahembwe menshi ntiyarengerejwe amezi atandatu. Nyamara umururumba wa Kagame na Kabarebe ntiwatumye barekeraho kuko kugeza ubu bagisirisimba muri Congo bashaka ibyo basahura ngo bakomeze badamarare batitaye kubitambo by’abana b’igihugu bahagwa.

UKO TUBIBONA

Kuva 1990, hari abasirikare batari baruhuka nagato kubera intambara z’urudaca bahoramo, nyamara zikiriza Kagame na Kabarebe. Nko muntambara ya kabiri ya Kongo yo gushaka guhirika Kabila, yatwaye abana b’igihugu batagira ingano. Urugamba rwabereye ahantu nka Pueto cg kitona, abana baguye Kisangani barwana n’abagande muri macye, abasore ibihumbi byinshi bahabereye ibitambo. Abasirikare b’u Rwanda nibo basirikare kwisi bakora akazi kenshi ariko kandi ninabo basirikare babayeho nabi ndetse bahembwa nabi. Ikindi kibabaje n’uko abasirikare b’u Rwanda badafatwa nk’ingabo z’igihugu ahubwo bafatwa nk’abasirikare ba Kagame.

Igihe kikaba kigeze ngo bazibukire, bagire ubutwari bareke gukomeza kugaraguzwa agati no kwijandika mukumena amaraso ariko nabo batiretse kuko nkubu abari kugwamuri M23 n’imiryango yabo ibihomberamo. Ngabo z’urwanda, buriwese aho uri gerageza wibaze kuki muhora murikongo? Ibuka bagenzi bawe bose bahasize ubuzima uyumunsi imiryango yabo ibayeho gute? Leta ya bohereje yo ibamariye iki?Abahakomerekeye buzuye mu bitaro Rwinkwavu na Kanombe ubu babayeho bate? Ingabo z’u Rwanda ntimukwiye gukomeza kubaho nk’abacakara ba Kagame na Kabarebe ngo mukomeze kubapfira bo bazamura amagorofa bagura amato mu Nyanja.

Bishoboka bite ko soldat wirirwa muri Nyungwe imvura imuri kumutwe, imbunda imushengura urutugu, ukwezi kwashira agahembwa ibihumbi makumyabiri (20.000 frw) mu gihemugenzi we banganya ipet iw’umu GP ahembwa ibihumbi Magana abiri (200.000 FRW)? Ngaboz’u Rwanda namwe banyarwanda mufite abana cg abavandimwemuri RDF, ibi bisaba ko muba mwambaye amadarubindi cyangwa mwarize kaminuza kugira ngo mubone ko murengana? Hanyuma se ninde uzabarenganura? Nimwebwe mugomba kwihesha agaciro mwanga gukomeza gufatwa nk’abaja mu gihugu cyanyu murushwa guhembwa neza n’abazamu.

NKUNZURWANDA MIHIGO ALEXIS

RADIO ITAHUKA  PRETORIA- AFRIKA Y’EPFO